Reflections

Pasasalamat (December 31, 2019)

Posted on by withinandbeyond

7th Day of Chistmas

Sa ating Ebanghelyo, napag-usapan si Juan Bautista. Ito ang ipinangalan sa magiging tagapagpahayag at tagapaghanda sa pagdating ng Panginoon.
Ang Pangalang Juan ay nangangahulugang “ANG DIYOS AY MAPAGPALA.” Ito ay totoo at tayo mismo ang makapagpapatunay nito.

Sa huling araw ng taong 2019, marapat at matuwid na alalahanin natin ang napakaraming biyaya ng Diyos sa atin. Makita natin at mapahalagahan natin ito at gayundin ay MAKAPAGPASALAMAT tayo sa Diyos dahil sa Kanyang kabutihan sa atin. Kasama ng pasasalamat ay ang patuloy na pagdulog sa Kanya ng biyayang kailangan natin na makatutulong sa paglago natin sa ating pananampalataya at pag-unlad sa buhay.

PANGINOON, SALAMAT po sa iyong walang sawang pagpapala.

Amen.

Pasko pa (December 30, 2019)

Posted on by withinandbeyond

Sixth Day of Christmas

“Maligayang Bagong Taon po Pader.” Ito na ang bati ng mga tao. Laging sagot ko naman ay Maligayang Pasko kasi sabi ko ay “Pasko pa.”

Mga kapatid, totoo na magbabagong taon na ngunit sana ang ating pagninilay ay nakatutok pa din sa pagsilang ng ating Panginoon o sa Kapaskuhan. 

Kahit nga ang Bagong taon, ito ay naka-focus sa Mahal na Birhen na pinahahalagahan natin dahil sa pagdala sa sinapupunan at pagsilang niya sa ating Panginoong Hesus.

Si propeta Anna ay ating huwaran sa araw na ito na nag-aanyayang pagnilayan ang biyaya ng kapanganakan ng Panginoong Hesus. Katulad din Niya tayo ay inaanyayahan na patuloy na papurihan at pasalamatan ang Diyos dahil sa Dakilang Pagpapala na ipinagkaloob niya sa atin. 

Panginoon, papuri at pasasalamat po sa iyo sapagkat sa pamamagitan ng iyong pagsilang kami ay napagpala mo.

Amen.

Feast of the Holy Family (December 27, 2019)

Posted on by withinandbeyond

Madalas kong tinatanong ang mga nakikilala kong mag-asawa na nagsama ng matagal kung ano ang sikreto nila sa kanilang pagsasama.

Ito ang tatlo sa pinakamadalas na sagot nila na maari rin na makatulong sa inyo:

Una, bukas at maayos na komunikasyon. Sabi nga, “walang hindi naidadaan sa mabuti at maayos na usapan.” Tinutukoy nito hindi lang ang komunikasyon ng mag-asawa bagkos pati na din ng anak at nangg buong mag-anak.

Ikalawa, respeto at pagmamahal.

Ikatlo at higit na binibigyang diin nila ay ang DIYOS. Tandaan ang sinabi ni San Pablo, “Kung ang Diyos ay kasama natin sino ang makalalaban sa atin?”(Rom 8:31). Katulad ng karanasan ng Banal na Pamilya, iniligtas at ginabayan sila ng Panginoon at hindi hinayaang mapahamak. Gayundin tiyak ang gagawin ng Diyos sa ating mga tumatawag at naniniwala sa kanya. Ililigtas, gagabayan at pagpapalain.

Nawa matuto tayo sa karanasan ng Banal na Pamilya at mga pamilyang may maganda at mabuting pagsasamahan.

Pangjnoon gabayan mo po at pagpalain ang bawat pamilya lalo na ang mga pamilyang dumadaan sa iba’t-ibang pagsubok.

Amen.